La situacion es grèva, que, malgrat lo desir de mai en mai fòrt de la populacion de tornar aprene sa lenga pròpria, l’occitan es en perilh de mòrt:

1) L’occitan demòra gaireben absent de l’ensenhament, de l’escòla a l’universitat.
2) Sa preséncia dins los mèdias (jornals, television, ràdio) es anecdotica.
3) En defòra de qualques iniciativas coma lo mètro de Tolosa, es encara mespresat dins l’espaci public.
4) L’estat francés respècta pas sas promessas.
5) En comparason, l’occitan es reconegut dins los estats espanhòl e italian (e mai s’o es dins de condicions insufisentas). E a Mónegue, l’occitan es pas encara reconegut.

Dempuèi la reconeissença dins la constitucion francesa, en 2008, de las lengas dichas “regionalas” coma un “patrimòni de França”, s’es pas fach res de concret en favor d’aquelas lengas e doncas de la nòstra, l’occitan. Pièger: mentre que l’anciana ministra de la cultura, Cristina Albanèl, prometèt en 2008 una lei de proteccion de las lengas “regionalas”, lo nòu ministre, Frédéric Mitterrand, a daissat comprene que fariá pas res.

Protestem e exigiscam totes e totas la mesa en plaça d’una politica lingüistica dins l’ensenhament, dins los mèdias, dins la vida publica, pr’amor que l’occitan es nòstra lenga!

Free Occitània!
Lo 21 d’octòbre de 2009
Iniciativa per Occitània
http://www.iniciativaoc.org
http://iniciativaoc.midiblogs.com/<br /> http://es.groups.yahoo.com/group/iniciativa-per-occitania/