La situacion socio-istorica de las lengas regionalas de França, los tèxtes internacionals ratificats, la reconeissença constitucionala recenta de las lengas regionalas, sa preséncia efectiva dins los programas oficials, lo convencionament particular amb las collectivitats mençonat al còdi de l'educacion, tot aquò implica un tractament especific de las modalitats de recrutament e de formacion dels ensenhaires de lengas e culturas regionalas en general, e occitanas en particular.

Especificament, fa mestièr d’aver un CAPES amb un nombre de pòstes proporcionat als besonhs, çò qu’es luènh d’èsser lo cas ara, e d’espròvas qu’asseguren la qualitat (linguistica en particular) dels candidats e que permetan a totes de concórrer dins la transparéncia. Non solament es necessari qu’un CRPE especial siá mantengut per recrutar los mèstres de las classas bilinguas, mas las competéncias en lenga regionala devon tanben èsser valorizadas al CRPE general. Demandam que sián establidas pel CRPE d’espròvas especificas de lenga (de bonificacion pel CRPE general e de qualificacion per l’especial) e/o per lo CRPE especial qu’una part de las espròvas comunas d’admissibilitat e d’admission siá passada en occitan.

Dins lo CAPES d’occitan, nòstra preferéncia es de conservar un nombre d’espròvas que permeta de s’assegurar dirèctament del nivèl dels candidats dins totes los aspèctes de sa formacion. Dins l’ipotèsi qu’un escrich reduch a doas espròvas seriá fin finala impausat a totes, l’espròva d’occitan (que l’autra deurà èsser avodada a la segonda valéncia del nòstre CAPES bivalent), calrà que siá rica e meta en valor divèrses aspèctes de la competéncia del candidat (per exemple un comentari de tèxt(es), seguit de reviradas brèvas, occitan francés / francés occitan). Las espròvas oralas (de didactica e de coneissença del sistèma educatiu e de sas tòcas) se deuràn debanar tant coma possible en occitan per èsser escasença d’assegurar la capacitat dels candidats a s’exprimir dins la lenga.

Las universitats (UFR e IUFM) representadas decidisson de trabalhar amassa a la certificacion qu’en tota ipotèsi sa plaça creisserà dins lo dispositiu de formacion. Un grop de trabalh es format entre las universitats de Montpelhièr e Tolosa per aquò faire, e tota universitat qu’o desire lo pòt rejónher.

Las universitats (UFR e IUFM) representadas decidisson de manténer un contacte estrech e regular per seguir las causidas de las formulas de master fachas per las Universitats e sa mesa en plaça, que dins la redefinicion dels Masters se jòga la question essenciala del ligam entre ensenhament, recrutament d’ensenhaires, e recerca. Es doncas essencial pel manten e lo desenvolopament d’una capcitat d’elaboracion e de transmission de sabers sus la lenga occitana e mai sus la cultura occitana dins totes sos aspèctes.

A Tolosa lo 7 de novembre de 2008

Coordinacion dels ensenhaires d’occitan de l’Ensenhament superior UFR e IUFM